ဘဝအသွင်ကို ဓမ္မအမြင်နဲ့ ကြည့်ပါ
ဘဝ တစ်ခု ရလာပြီဆိုရင် ရလာတဲ့ ဘဝဟာ ထာဝရ တည်ငြိမ်တဲ့ ဘဝလား ´´ကိုယ့်ကိုယ်ကို စဉ်းစားကြည့်။ မနက်မိုးသောက် အလင်းရောက်ပြီးတဲ့အခါ ။ နေဝင်ပြီးနောက် ညချမ်းရောက်လာလို့ အိပ်ရာဝင်တော့မယ့်အခါ ငါ့မှာ ညက အိပ်ပျော်နေတုန်း စိတ်တွေ ရုပ်တွေ မနက်တုန်းက ရှိတဲ့
စိတ်တွေ ရုပ်တွေ အခုမရှိတော့ဘူး။ ဒီကနေ့ရှိတဲ့ စိတ်တွေ ရုပ်တွေ နောက်ရက်ရှိတော့မှာ မဟုတ်တော့ဘူး။ ငါဟာ အမြဲတမ်းရွေ့နေတာပဲ။ ဧရာဝတီ မြစ်ရေကြီးဟာ တရွေ့ရွေ့ စီးဆင်းနေ
သလို ငါ့ရဲ့သန္တာန်မှာရှိတဲ့ စိတ်တွေ ရုပ်တွေ ငါ့ရဲ့ဘဝကြီးဟာ တဖြည်းဖြည်း ရွေ့နေတာပါ
လားလို့ ဆင်ခြင်သုံးသပ်ထိုက်တယ်။ ဒီဓမ္မာရုံကြီးပေါ် တက်လာတယ် ဆိုပါစို့။ ခြေတစ်လှမ်းပြီးတစ်လှမ်း တက်လာတာ မဟုတ်လား။ ပထမဆုံး ခြေလှမ်းပြီးတော့ ဒုတိယခြေလှမ်း ဒုတိယခြေလှမ်းပြီးတော့ တတိယခြေလှမ်း ဟောဒီလိုလှမ်းလာတယ်။ ဒုတိယခြေလှမ်းရောက်လာတာနဲ့ တစ်ပြိုင်နက်
ပထမခြေလှမ်း ရှိသေးလား။ တတိယခြေလှမ်း ရောက်လာတာနဲ့ ဒုတိယခြေ လှမ်း ရှိသေးလား။
ဒီအတိုင်းပဲ ရှေ့ကဟာ ပျောက်ပျောက်သွားပြီးနောက်က ရောက်ရောက် လာနေတာ ။
အမြဲတမ်း ရှိနေတာ မဟုတ်ဘူးတဲ့။ တကယ်အစစ်က မရှိတော့ဘူး။ ကော်ပီတွေပဲ ကျန်နေတာ။
ကော်ပီတောင်မှ ပုံတူဟုတ်ရဲ့လား။ အမေမွေးစ ငယ်ငယ်တုန်းက ဓာတ်ပုံကလေးနဲ့
အခု အသက် ၅၀- ၆၀ အရွယ် ဓာတ်ပုံ ယှဉ်ပြီးချိတ်ကြည့်ပါလား။ အဲဒါ ကော်ပီလို့တောင် ဘယ်သူပြောဦးမလဲ။ အလွန်ကွဲပြား ခြားနားသွားပြီ။ ချက်ချင်းကြီး ပြောင်းသွားတာ မဟုတ်ဘူးတဲ့။
ဖြစ်စဉ် process အတိုင်း အဆင့်ဆင့် ပြောင်းသွားတာ ။ သို့သော် မတူဘူးဆိုတဲ့ ခြားနားချက် difference ကိုတော့ မသိဘူး။ ပြောင်းတာတွေ ကြာလာလေလေ ခြားနားမှုက သိသာလာလေ။
ဥပမာ။ ၁၀ နှစ် ၁၅ နှစ်ဆို အရမ်းကွာသွားပြီ။ အဲဒါ ၁၀ နှစ်မှာ တစ်ခါပြောင်းတာ မဟုတ်ဘူး။
စက္ကန့်တိုင်းမှာ ပြောင်းနေတာ။ သဘာဝတရားက အမြဲတွန်းပို့တာ push လုပ်တာ ခံနေရတယ်။
မယုံရင် အိပ်ရာပေါ် အိပ်နေပေါ့။ အိုချိန်တန် အိုသွားမှာပဲ။ ရပ်နေတာမဟုတ်ဘူး။သွားနေတာ။
ဒီလို သွားနေတာကြီးကို မသွားအောင် ဘယ်သူက ထိန်းထားနိုင်သလဲ။ဘယ်သူမှ မထိန်းနိုင်ဘူး။
ထိန်းလို့လည်း မရဘူးတဲ့။ ဘယ်သူကမှလည်း အကာအကွယ် မပေးနိုင်ဘူး။ ဘဝအသွင်ကို ဓမ္မအမြင်နဲ့ ကြည့်ရင် ယခုလိုပဲမြင်ရမှာပါ။
( ဒေါက်တာ အရှင်နန္ဒမာလာဘိဝံသ ၏ ဘဝအသွင်ကို ဓမ္မအမြင်ဖြင့် ရှုကြည့်ခြင်း တရား
တော်မှ ထုတ်နှုတ် ပူဇော်ပါသည်။
No comments:
Post a Comment