ခိုက်ရန်မများ စည်းလုံးထား
"ရှေးက ငုံးပေါင်း"
ဝိသမဝါဒီ၊ မညီညွတ်ခြင်း
မျိုးဆွေသင်းတို့၊ ချင်းချင်းမမျှ
ကွဲပြားကြလည်း၊ ရှေးကငုံးပေါင်း
ပျက်စီးကြောင်းကို၊ ထုံးဟောင်းမှတ်ယုံ
ရေးပုံတဝ၊ ရွှေဉာဏ်ဆ၍
သားလှသည်းအူ၊ သတိမူလော့။ ။ (၂၁၉)
လွန်လေပြီးသောအခါ ဗာရာဏသီပြည် ဗြဟ္မဒတ်မင်းလက်ထက် ဘုရားလောင်းသည် ငုံးငှက်အမျိုး၌ဖြစ်၍ ငုံးအများခြံရံလျက် တော၌နေ၏။ ထိုအခါ ငုံးဖမ်းသော မုဆိုးသည် ငုံးတွန်သံဖြင့် မိမိမြည်၍ ငုံးအများစုရုံးစေပြီးလျှင် အထက်၌ကွန်ကို ပစ်၍ အောက်အစွန်း၌ ခြေဖြင့်နင်းပြီးမှ ငုံးတို့ကိုဖမ်းယူ၏။
အခါတစ်ပါး ဘုရားလောင်းသည် ငုံးတို့ပျက်စီးခြင်းကို မြင်၍ အကြေင်းဥပါယ်ကို ဆင်ခြင်သော် "အထက်၌ ကွန်ကို ပစ်လျှင်ပစ်ခြင်း တကောင် တကောင်စီ ကွန်တွင်း တပေါက် တပေါက်၌ ဦးခေါင်းကို စွပ်ထား၍ ကွန်ကို တညီတညာ ချီကုန်းပြီးလျှင် သင့်ရာအရပ်သို့ဆောင်၍ ဆူးချုံထက် တင်ပြီးမှ အောက်အရပ်က လိုရာထွက်ပြေးကုန်အံ့"ဟူ၍ ကြံပြီးလျှင် ထိုအကြောင်း ဥပါယ်ကို ငုံးတို့အားကြား၏။ ငုံးအပေါင်းလည်း တညီတညာတည်း ဝန်ခံကြ၏။
ထို့နောက် မုဆိုးကွန်ပစ်သည့်ကာလ ဝန်ခံချက်အတိုင်းကွန်ကိုချီ၍ ဆူးချုံထက် တင်လျက် အောက်ကလျှိုးပျံ၍ ထွက်ကုန်၏။ မုဆိုးလည်း ကွန်ကိုဖြေယူ၍ နေဝင်မှ လက်ချည်းသာအိမ်သို့ပြန်၏။
ထိုအခါမယားက "သင်ကား လက်ချည်းသာ လာဘိ၏။ အခြားမှာ ကျွေးမွေးစရာ ရှိလေ၍လော"ဟု ဆို၏။
"အဘယ် ရှေးအခါကဲ့သို့မဟုတ်၊ ယခု ငုံးတို့ ညီညာသဖြင့် ကွန်ကိုချီ၍ ပျံလေကုန်သည်။ သို့သော်လည်း မစိုးရိမ်လင့်၊ ညီညာခြင်းမည်သည်ကို ရခဲစွ၊ အခါခပ်သိမ်း ညီညာနိုင်မည် မဟုတ်၊ မညီညာသောအခါ ငုံးတို့ကို ဖမ်းယူ၍ သင်၏မျက်နှာကို ရွှင်စေလျက် အိမ်သို့ ပြန်လာအံ့"ဟု ဆို၏။
ထို့နောက် လေးငါးရက်ကြာမြင့်လျှင် ကျက်စားရာမြေပြင်၌ ငုံးတကောင်သည် ငုံးတစ်ကောင်၏ဦးခေါင်းကို အမှတ်မဲ့နင်းမိရာ သည်းမခံဘဲ အမျက်ထွက်၍ သင်ချည်းသာ ကွန်ကိုချီသလော၊ ငါလည်းမချီသလော"ဟု အချင်းချင်းခိုက်ရန်ဖြစ်၏။
ထိုအကြောင်းကို ဘုရားလောင်းကြားသိ၍ "ယခု မညီမညာဖြစ်တော့အံ့၊ မညီမညာသောအရပ်၌ ချမ်းသာခြင်းမည်သည် ရှိမြဲမဟုတ်"ဟု ဆို၍ မိမိအခြံအရံနှင်တကွ အခြားအရပ်သို့ ပျံသွား၏။ ကြွင်းသော ငုံးငှက်တို့သည် အညီအညာကွန်ကို မချီသဖြင့် မုဆိုးဖမ်းယူလေ၏။
ငုံးတို့သည် ဝမ်းမြောက်ဝမ်းသာ ညီညာကုန်သည်ရှိသော် ပိုက်ကွန်ကိုယူဆောင်၍ ပျံသွားကုန်၏။ မညီမညာ ငြင်းခုံသောအခါ၌ မုဆိုးလက်သို့ လိုက်ရကုန်၏
No comments:
Post a Comment